Sumqayıtda məktəblərin birində valideyn qrupuna "çiyələk kviki" adı ilə tanınan narkotik maddənin məktəbin həyətində uşaqlara verildiyi, valideynlərin bununla bağlı diqqətli olmalarının gərəkliyini bildirən xəbərdarlıq göndərildiyi iddia olunub.

Bizimlider xəbər verir ki, sözügedən xəbərdarlıqda bildirilib ki, çiyələk qoxusu gələn və çiyələk konfetinə bənzəyən bu dərman kristal metamfetamindir. 

Həmçinin qeyd olunub ki, onun şokolad, fıstıq yağı, kola, albalı, üzüm, portağal aromatlı versiyaları da mövcuddur. 

Buna görə də valideynlərdən uşaqlarına yad adamlardan konfet almamalı olduğunu izah etmələri vurğulanıb. Daxili İşlər Nazirliyinin (DİN) Mətbuat Xidmətinin əməkdaşı Elbrus İbrahimov məsələ ilə bağlı Bizimlider-ə açıqlamasında qeyd edib ki, sosial şəbəkələrdə ölkə ərazisində məktəblərdə şagirdlərə narkotik vasitə təklif edilməsi ilə bağlı paylaşılan məlumatlar həqiqəti əks etdirmir:"Polis əməkdaşları tərəfindən bu paylaşım tam və hərtərəfli araşdırılıb, müəyyən olunub ki, həmin paylaşım xarici ölkələrdən birinə aid internet resurslarında yayılıb".