Hər Ramazan ayında müzakirə olunan mövzulardan biri də namaz qılmayan şəxslərin oruc tutmasının doğru olub-olmaması ilə bağlıdır.

Bəs namaz qılmayan şəxs oruc tuta bilərmi? Dində bunun hökmü nədən ibarətdir?

Qafqaz Müsəlmanları İdarəsinin əməkdaşı, ilahiyyatçı-alim Samid Quliyev Bizimlider-ə açıqlamasında bildirib ki, orucun namaz ilə birlikdə tutulmaq kimi bir şərti yoxdur:

"Hazırda mübarək Ramazan ayını yaşayırıq. İslam peyğəmbəri (s.ə.s.) xütbələrinin birində "mübarək Ramazan ayı öz rəhmət və bərəkəti ilə bizim üzərimizə gəlir" söyləyib. Bu, özünəməxsus fenomendir ki, biz ona getmirik, ay öz rəhməti ilə bizə doğru gəlir. Biz bu aydan nə qədər bəhrələnib Allaha yaxınlaşacağıq, artıq o bizim əməllərimizdən asılıdır. Əslində, mübarək Ramazan ayının məğzi insanın ilahi təqvaya sahib çıxmasıdır. Təqva isə namazla kamilləşən amildir. İslama görə, namaz və oruc vacib əməllərdir.

Əgər kimsə bu vacibatları tərk edərsə, günahkardır. Hər iki əməl ayrı-ayrılıqda vacib əməldir. Orucun namazla tutulmaq kimi şərti yoxdur. Bir kəs namaz qılmayaraq oruc tutsa, bu onun orucunun qəbuluna mane olmur. İbadətlərin qəbulu Allah dərgahındadır. Kiməsə: "Sən namaz qılmırsan, oruc tutma", - demək düzgün deyil".