“Nazirlər Kabinetinin təsdiq etdiyi minatəmizləmə planına uyğun olaraq bu il 40 min hektar ərazinin mina və partlamamış hərbi sursatlardan təmizlənməsi nəzərdə tutulur”.

“Report” xəbər verir ki, bunu jurnalistlərə Nazirlər Kabinetinin aparat rəhbəri Rüfət Məmmədov bildirib.


Hökumət rəsmisi qeyd edib ki, ötən ilə nisbətən bu il iki dəfə artıq ərazilərdə mina təmizlənməsi işləri həyata keçiriləcək:

“Minatəmizləmə işlərinin belə sürətlə aparılmasında əsas məqsəd İşğaldan azad olunmuş ərazilərdə əlverişli şəraitin yaradılması, sahələrin iqtisadi dövriyyəyə buraxılması, turizm sahəsi və dağ mədən sənayesinin inkişaf etdirilməsidir. Bundan başqa yaşayış məntəqələrinin bərpası və yenidən qurulması da nəzərdə tutulur”.

R.Məmmədovun sözlərinə görə, Ağdam rayonu partlamamış hərbi silah-sursatlardan daha çox çirkləndiyi üçün minatəmizləmə işlərində yeni sistemin tətbiqinə başlanılıb:

“Bu ərazilər digər yerlərdən daha çox çirkləndiyi üçün süni intellekt əsasında çalışan, havadan mina sahələrinin tədqiqatı sisteminin tətbiqinə başlamışıq. Azərbaycan dünyada bu tətbiqdən istifadə edən ilk ölkələrdən biridir. Bu sistemlə minaların yerini dəqiq müəyyən etmək olur”.

Aparat rəhbəri əlavə edib ki, bu il görülən işlər çərçivəsində minatəmizləmə əməliyyatlarına cəlb edilən qurumların maddi-texniki bazasının gücləndirilməsi də təmin olunacaq.