Rusiya Prezidenti Vladimir Putin ölkənin Müdafiə Nazirliyinin rəhbərliyi ilə müşavirə keçirib.

Kremldə baş tutan iclasda hərbi-sənaye kompleksinin rəhbərliyi və raket istehsalçıları da iştirak ediblər.

Putin “Oreşnik” raket sisteminin seriyalı istehsalını elan edib. Ölkə başçısı orta mənzilli ballistik raketin sınaqlarının uğurla keçdiyini, sınaqları davam etdirəcəklərini söyləyib.

O qeyd edib ki, bu silahın xüsusi gücünü və qüdrətini nəzərə alaraq, sistem məhz Strateji Təyinatlı Raket Qoşunlarının silahlanmasına veriləcək.

Putin bir daha “Oreşnik” raketi ilə mübarizə aparacaq silahın olmadığını vurğulayıb:

"Hazırda dünyada “Oreşnik”in qarşısını almaq üçün hər hansı vasitə yoxdur. "Oreşnik” Rusiyanın ərazi bütövlüyünün daha bir etibarlı qarantıdır”.