Azərbaycandan növbəti yük qatarı Rusiyaya “Aqroekspress” layihəsi çərçivəsində gələn həftə Astaradan göndəriləcək.

“Report” xəbər verir ki, bunu “Alliance Logistics” MMC-nin rəhbəri Natiq Heydərov bu gün Xaçmazda “Aqroekspress” layihəsinin işə salınması çərçivəsində Ləcət stansiyasında ilk yük qatarının göndərilmə mərasimində deyib.

Onun sözlərinə görə, ötən il “Aqroekspress” layihəsi ilə bağlı Azərbaycanla Rusiya arasında müqavilə imzalanıb: “Azərbaycan və Rusiya arasında əlaqələr dinamik şəkildə inkişaf edir. Ölkələr arasında ticarət dövriyyəsi ilbəil artır. Bu gün həyata keçirilən tədbir ölkələr arasında əlaqələrin inkişafına xidmət edəcək. Bu isə bizim şirkətimiz üçün vacibdir”.

Azərbaycanda “Aqroekspress” layihəsi Azərbaycan-Rusiya İşgüzar Şurası, “Rusiya İxrac Mərkəzi” SC (RİM), “Roseksimbank” SC, “Azərbaycan Dəmir Yolları” QSC, “RDY” ASC-nin dəstəyi ilə “Alliance Logistics” MMC və “RDY Logistika” SC tərəfindən həyata keçirilir.

Azərbaycandan Rusiyaya “Aqroekspress” vasitəsilə çatdırılan ilk yük meyvə-tərəvəz məhsulları, xüsusilə Rusiya bazarında tələbatın yüksək olduğu təzə Azərbaycan xurması oldu.