Biz Qərbin Ukraynada işlənmiş qarşıdurma sxemlərini açıq-aydın ötürməyə çalışdığı Cənubi Qafqazda güclənən həyəcanverici tendensiyalardan narahat olmaya bilmərik.

APA-nın Moskva müxbirinin məlumatına görə, bu barədə Rusiya Xarici işlər Nazirliyinin saytında Mariya Zaxarovanın adından yayılan bəyanatda bildirilib.

"Qardaş Ermənistanın görünməmiş xarici təzyiqlərə məruz qaldığını görürük. Ölkələrimiz və xalqlarımız arasında çoxəsrlik əlaqələrə xələl gətirmək və Rusiyanın regiondakı siyasətini gözdən salmaq üçün addımlar atılır. Vaşinqton və Brüsselin göstərişi ilə fəaliyyət göstərən çoxsaylı fondlar, QHT-lər və media cəmiyyətdə anti-Rusiya əhval-ruhiyyəsi yaratmağa çalışır.

Biz əminik ki, xarici qüvvələrin Moskva ilə İrəvan arasında çəkişmə yaratmaq cəhdləri uğurlu olmayacaq. Biz Ermənistanla strateji müttəfiqliyi və çoxşaxəli əməkdaşlığı gücləndirmək əzmindəyik. Bu da bizə hazırkı çağırışların öhdəsindən birgə gəlməyə imkan verəcək. Biz hərbi-siyasi və hərbi-texniki xətlər üzrə dialoqu inkişaf etdiririk", - deyə Rusiya XİN rəsmisi vurğulayıb.

Zaxarova qeyd edib ki, Qərbin təntənəsiz və həyasız yanaşmasını Ermənistan-Azərbaycan münasibətlərinin normallaşması ilə bağlı da müşahidə etmək olar: "Problemin nə regional spesifikliyi, nə də xüsusi həssaslığı nəzərə alınmır. Vaşinqton və Brüsselin əsl məqsədləri heç də kompromis və balanslaşdırılmış həll yollarının inkişafı deyil, özünü reklam etmək və Rusiyanı Cənubi Qafqazdan sıxışdırıb çıxarmaqdır.

Bizim üçtərəfli işlərimiz mənimsənilir və təhrif edilir. Avropa İttifaqı, ATƏT, Fransa adı altında Qərb emissarlarının Ermənistana gəlişləri artıb. Bütün region əhalisinin maraqlarını nəzərə almayan tələsik təşəbbüslər irəli sürülür. Bu, Rusiya, Azərbaycan və Ermənistan liderləri arasında 9 noyabr 2020-ci il tarixli saziş əsasında çətin şəraitdə əldə edilmiş balansın pozulmasına gətirib çıxara bilər".

Rusiyalı diplomat paralel olaraq Moskvanın güya Ermənistan qarşısında təhlükəsizlik öhdəliklərini yerinə yetirməməsi ilə bağlı əsassız ittihamların yayıldığını xatırladıb: "Bu xüsusda xatırlatmaq istərdik ki, məhz bizim ölkə 2020-ci ilin noyabrında müharibəni dayandırmış, regiona sülh və sabitlik gətirən sülhməramlılar göndərmiş və bu günə kimi Bakı ilə İrəvan arasında silahlı insidentlərin həllinə həlledici töhfələr verir. Xarici qüvvələrin Rusiya sülhməramlı kontingentinin çıxarılmasına nail olmaq cəhdləri məhz Cənubi Qafqazda sabitliyi pozmağa yönəlib".