Rusiya MAQATE ilə İran arasında Tehranda keçiriləcək məsləhətləşmələri alqışlayır, lakin onların hər hansı irəliləyişə nail olacağına heç kimin ümidi yoxdur.


Publika.az xəbər verir ki, bunu TASS-a Rusiya Federasiyasının Vyanadakı beynəlxalq təşkilatlar yanında daimi nümayəndəsi Mixail Ulyanov deyib.


Daimi nümayəndə məsləhətləşmələrin noyabrın ikinci yarısına planlaşdırıldığını, lakin ABŞ, Böyük Britaniya, Almaniya və Fransanın MAQATE Rəhbərlər Şurasının iclasında təqdim etdiyi “vaxtında olmayan və əks-məhsuldar” qətnamənin olduğunu xatırladıb. Onun sözlərinə görə, İrana təzyiq cəhdi onların keçirilməsini təxirə salıb.


“Sevindirici haldır ki, susqunluq çox da uzun çəkmədi. Qarşıdakı görüşdə irəliləyiş olacağına ümid yoxdur. Ancaq ümid etmək istərdim ki, İran ərazisindəki bir sıra nöqtələrdə antropogen uran hissəciklərinin aşkarlanması ilə bağlı qalan həll olunmamış məsələlərin tezliklə həlli maraqları naminə, sonrakı daha dərin və əsaslı dialoq üçün ilkin şərtlər yaradacaqdır”, - Ulyanov bildirib.


O əlavə edib ki, hər iki tərəfdə siyasi iradə olarsa, “bütün bu məsələlər həlli üçün kifayət qədər əlverişlidir”.