Türkiyədə baş vermiş zəlzələ ilə bağlı qardaş ölkədə olan Azərbaycanın Fövqəladə Hallar Nazirliyinin (FHN) bir qrup əməkdaşı Kahramanmaraş şəhərindən Hataya yola düşüb.

“Report”un Türkiyəyə ezam olunmuş əməkdaşının xəbərinə görə, qardaş ölkədə qeydə alınmış təbii fəlakətin aradan qaldırılması üçün FHN-in 114 nəfərdən ibarət şəxsi heyəti Hataya gedib.

Eyni zamanda Hatay şəhərinə xilasedicilərlə yanaşı FHN-in xüsusi təlim keçmiş iki iti də aparılıb.

Azərbaycanın xilasediciləri orada axtarış-xilasetmə əməliyyatları həyata keçirəcəklər.

Hazırda FHN-in digər qrupları Kahramanmaraşın müxtəlif ərazilərində axtarış-xilasetmə işlərini davam etdirirlər.

Qeyd edək ki, Türkiyədə baş vermiş zəlzələ ilə bağlı qardaş ölkəyə gedən Azərbaycanın FHN-in hazırda 760 heyəti zəlzələnin fəsadlarının aradan qaldırılması istiqamətinə cəlb edilib.

İndiyədək Azərbaycan xilasediciləri Türkiyənin Kahramanmaraş şəhərində dağıntılar altından 53 nəfəri sağ, 741 nəfərin meyitini çıxarıb.