Qərbi Azərbaycan Xronikası layihəsi çərçivəsində növbəti analitik süjet hazırlanıb.

“Qərbi Azərbaycana qayıdış sülh müqaviləsindən asılıdır” adlı süjetdə Azərbaycanla Ermənistan arasında normallaşma prosesinə ilk növbədə vasitəçi rolunda çıxış etmək istəyənlərin mane olduğu, Cənub Qafqazda davamlı sülhün olmasını, təhlükəsizliyin təminini istəyən regional əməkdaşlıq tərəfdarlarının normallaşma prosesinin başa çatmasına çalışdıqları bildirilir.

Qeyd olunur ki, son zamanlar Azərbaycanla Ermənistan arasında danışıqlara Qərb, o cümlədən ABŞ və Avropa İttifaqı Şurası daha çox maraq göstərir:

“Bunun üçün onlar hətta rəsmi Bakı ilə İrəvan arasında ikitərəfli görüş də təşkil edirlər. Qərbin məsələyə belə yanaşmasından Rusiya və Ermənistanda narahat olanlar var. Son günlər Moskvada verilən açıqlamalar Ermənistanda revanşistlər və Azərbaycanın Qarabağ iqtisadi bölgəsindəki separatçıların tör-töküntüləri bir az fərqli redaktə ilə təkrarlayırlar”.

Süjetdə Rusiya Xarici İşlər Nazirliyinin MDB ölkələri üzrə dördüncü departamentinin direktoru Denis Qonçarın, separatçı tör-töküntülərin başçısı Araik Arutyunyanın, Ermənistanın keçmiş xarici işlər naziri Vardan Oskanyanın sərsəm açıqlamalarına cavab verilir:

“Bunlar Ermənistan cəmiyyətini sülh müqaviləsinin imzalanması təhlükəsi ilə şantaj edirlər ki, sənəd imzalansa, Ermənistanı təhlükə gözləyir, hətta yenidən müharibə ola bilər. Beləliklə, Azərbaycanla Ermənistan arasında normallaşma prosesinin maneələri görünməyə başlayıb. Paşinyan vaxt uzadır, Rusiya Qərbin sülh müqaviləsinin şübhə altına alır”.

Sonda vurğulanır ki, Oskanyan, Arutyunyan və başqaları Kremlin züyünü tutaraq erməniləri yeni təhlükənin gözlədiyinə dair guya xəbərdarlıq edirlər:

“Rusiyaya Cənubi Qafqazda sülh sərf etmədiyindən Oskanyan kimi kadrlarının dilindən yanlış düşüncələr yayır. Çünki Azərbaycan-Ermənistan münasibətlərinin normallaşması bir sıra qüvvələri regionda oyundan kənar vəziyyətə salar. Belə olan halda heç Rusiya da mərkəzdə olmayacaq”.

Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.