Türkiyənin Antalya şəhərində Rusiya Baş Konsulluğunun yeni xidməti binasının açılışı olub.

Açılış mərasimində Rusiya Federasiyasının Antalyadakı baş konsulu Sergey Vetrik çıxış edib. O qeyd edib ki, Antalyada on minlərlə Rusiya vətəndaşı yaşayır və bir neçə milyon rus hər il buraya istirahətə gəlir. Konsul qeyd edib ki, 2023-cü ildə Antalyaya 3,5 milyon rusiyalı turist gedib.

“Biz konsulluq vəzifələrimizlə yanaşı, Rusiyanın Ankaradakı səfirliyinin rəhbərliyi altında Rusiya-Türkiyə münasibətlərinin inkişafına öz töhfəmizi veririk. Ötən il ərzində biz bir çox Rusiya-Türkiyə tədbirlərində iştirak etdik. Şübhəsiz ki, onlardan ən mühümü Rusiyanın xarici işlər naziri Sergey Lavrovun Antalya Diplomatik Forumunda iştirakı olub”, - konsul bildirib.

Vetrik bir çox mədəni tədbirlərin, o cümlədən dünya şöhrətli rus rəssamlarının iştirakı ilə rəsm sərgilərinin, bayram və idman tədbirlərinin təşkil edildiyini də qeyd edib.