Bu gün paytaxtın 150-dən çox əsas küçə və prospektlərində xüsusi kimyəvi maddələrlə əlavə gücləndirilmiş dezinfeksiya işləri aparılır.

Oxu.Az-ın məlumatına görə, dezinfeksiya işlərinə səhər saat 05:00-dan başlanılıb.

Paytaxtın kommunal xidmətindən bildirilib ki, 30-dan çox küçə artıq dezinfeksiya olunub:

“Xidmətin 2000-dən çox əməkdaşı tərəfindən dezinfeksiyaedici aparatlarla səkilərdə, yol kənarlarında, park və meydanlarda, küçələrdə quraşdırılmış dayanacaqlarda, obyektlərin qarşısında, yolkənarı məhəccərlərdə də tibbi-profilaktiki işlər aparılıb.

Daxili İşlər Nazirliyi öz təşəbbüsü ilə paytaxtın dezinfeksiya işlərinə qoşulub. Bu işlərə səkkiz ədəd xüsusi nəqliyyat vasitəsi ayırıb”.

Fövqəladə Hallar Nazirliyinin də üç ədəd texnikası dezinfeksiya işlərinə cəlb edilib.

Xatırladaq ki, dünən dezinfeksiya işləri ilə əlaqədar olaraq, paytaxt sakinlərinə bir sıra küçə və prospektlərə çıxmamaq barədə xəbərdarlıq edilmişdi.