Ürək xəstəlikləri dünya üzrə ən çox rast gəlinən ölüm səbəbləri sırasındadır. Kardioloqlar bu xəstəliklərin əsas səbəblərindən birinin yanlış qidalanma olduğunu bildirirlər və bəzi qidaların tezliklə həyatımızdan çıxarılmasının vacibliyini vurğulayırlar.

Ürək-damar sağlamlığını qorumaq üçün əsasən təbii, az işlənmiş qidalara üstünlük vermək tövsiyə edilir.

Kardioloq Prof. Dr. Alan Rozanski ürək sağlamlığı üçün zərərli ola biləcək qidalar siyahısını paylaşaraq, xüsusilə şəkərli, rafinə edilmiş karbohidratlar və yüksək dərəcədə işlənmiş ətlərdən uzaq durmağı məsləhət görüb. O qeyd edib ki, bu məhsullar yüksək miqdarda natrium, nitrat, nitrit və digər əlavə maddələr ehtiva edir. Aparılan tədqiqatlar göstərir ki, belə qidalar ürək xəstəlikləri və bəzi xərçəng növləri üçün risk yaradır.

Eyni zamanda, Kaliforniyada fəaliyyət göstərən ürək cərrahı Dr. Jeremy London, ürəyin zəif olduğunu göstərən əlamətləri açıqlayıb. Sosial mediada paylaşdığı məlumatda hazır sup, enerji içkiləri, ağ çörək, çox miqdarda un məmulatları və konservləşdirilmiş tərəvəzlərin ürək sağlamlığı üçün təhlükə yaratdığını qeyd edib. O, ağ çörək yerinə qara çörəyi, konservləşdirilmiş tərəvəzlər əvəzinə təzə tərəvəzlər seçməyi məsləhət görüb.

Həkimlərin tövsiyələrinə görə, ürək sağlamlığı üçün qida rasionunda təzə və təbii məhsullara üstünlük vermək, yüksək duz və şəkər tərkibli souslardan uzaq durmaq vacibdir. Bu sadə dəyişikliklər ürək xəstəliklərinin qarşısını almaqda mühüm rol oynaya bilər.