Gürcüstanın keçmiş prezidenti Mixail Saakaşvili Ermənistanın baş naziri Nikol Paşinyanı Aİ və NATO istiqamətində “qaçmağa” çağırıb.

“Rusiya demək olar ki, Ermənistandan göndərilən bütün kənd təsərrüfatı məhsullarına və erməni konyakına qadağa qoyub. Kreml rəhbərliyində erməni konyakını sevənlər özlərinə korluq verməyəcəklər (gürcü şərabına embarqo qoyulandan sonra da Kremlin bufetində gürcü jurnalistləri gürcü şərabına problemsiz qonaq edirdilər), sadə rusların fikirlərinə isə tüpürmək belə istəmirlər.

Amma bu qadağa Paşinyan üçün bütün qırmızı işıqları yandırmalıdır. Putin erməni konyakını deyil, Paşinyanın özünü sevmir və embarqo onu hakimiyyətdən kənarlaşdırmaq yolunda növbəti addımdır.

Mən Ermənistanın baş naziri üçün bir daha təkrar etmək istəyirəm. Hörmətli Nikol – qaç, daha sürətli qaç, arxana baxmadan KTMT-dən, Avrasiya İqtisadi Birliyindən qaç, Avropa İttifaqına, NATO-ya, yeni regional birliklərə qaç. Amma ən əsası Rusiyadan uzaqlaş, özünü və erməni dövlətçiliyini xilas et! Putin buldoq kimidir. Dişləyir və dişlərini tam sıxana qədər buraxmır. Sağ qalmaq üçün bu dişlərdən yayının.

Əminəm ki, hələ də gec deyil. Və tərəddüd etməyi və ləngiməyi dayandırın. Gecikmə ölümə bərabərdir!” — Saakaşvili Facebook səhifəsində yazıb.

Maraqlıdır, indiki məqamda Gürcüstanın keçmiş prezidentinin belə emosional çıxışına nə səbəb olub? O, yaxın gələcəkdə Ermənistan üçün hansı təhlükələri görür? Doğrudanmı belə təhlükələr var?

Pressklub.az-ın suallarını tanınmış ekspertlər cavablandırıb.

Hankuk Xarici Tədqiqatlar Universitetinin (Cənubi Koreya) professoru, politoloq Rövşən İbrahimov hesab edir ki, Saakaşvilinin təklifləri hələ Ermənistan üçün xilas demək deyil.

“Hətta, əksinə. Məsələ ondadır ki, bu, Saakaşvilinin özünün etdiyi, özünün inandığı şeylərdir və nəticədə indi bunun bədəlini ödəyir. O, prinsipcə, Paşinyana Ermənistana heç nə vəd etməyən Avropa İttifaqı və NATO-nun yerləşdiyi Qərbə qaçmağı təklif edir.

Saakaşvili bunu Rusiya ilə münasibətlərdə tamamilə ondan asılı vəziyyətə düşən, nəyisə itirə və nə iləsə üzləşə biləcək ölkəyə təklif edir.

Yəni, əgər Saakaşvilinin özü hazırda həbsdədirsə, Paşinyan Gürcüstanın keçmiş prezidentinin prinsipcə ona təklif etdiyi oyunu açıq şəkildə oynamağa başlasa, bunun sonu onun üçün daha fəlakətli olacaq. Təəssüf ki, başa düşdüyüm qədər, Saakaşvili indi üzləşdiyi vəziyyətdən heç bir dərs götürməyib”, – professor İbrahimov hesab edir.

Siyasi Menecment İnstitutunun rəhbəri Azər Qasımlı isə fərqli fikirdədir.

Onun sözlərinə görə, Gürcüstanın eks-prezidentinin xəbərdarlığı, ilk növbədə, Ermənistan-Azərbaycan sərhədində genişmiqyaslı müharibəyə səbəb ola biləcək təxribatları nəzərdə tutur.

“Bu, Paşinyan hökuməti üçün fəlakət olardı. Sülh müqaviləsi də imzalanmayıb, bu da Cənubi Qafqazda münasibətləri gərginləşdirir. Bütün bunların arxasında Rusiya və onun maraqları dayanır. O, özünün planlaşdırmadığı sülhdə maraqlı deyil”, – deyə institut rəhbəri bildirib.

O, həm də deyir ki, Moskvanın iqtisadi təzyiq variantları da mümkündür. “Bu, Rusiya qazının qiyməti, Ermənistan məhsullarının Rusiya Federasiyasına tədarükünə embarqo qoyulması və sair ola bilər”, – deyə Qasımlı yekunlaşdırıb.

Müəllif: Rauf Orucov – Mənbə: AYNA.az