Ermənistan və Azərbaycan qaz kəmərlərinin bərpası məsələsini hələlik müzakirə etməyiblər.

Publika.az xəbər verir ki, bu barədə “Suputnik Ermənistan”ın sorğusuna cavab olaraq Ermənistanın Ərazi İdarəetmə və İnfrastruktur Nazirliyi məlumat verib.

“Məlumat veririk ki, Azərbaycan tərəfi ilə bu məsələ haqda heç bir müzakirə aparılmayıb”, - nazirlik qeyd edib.

“Bu ərazilərin bərpası xərclərinə gəlincə, bu da hələ müzakirə olunmayıb”, - nazirlik əlavə edib.

2023-cü ilin oktyabrında Ermənistanın Ərazi idarəetmə və infrastruktur nazirinin müavini Hakob Vardanyan bildirmişdi ki, siyasi məsələlər həll olunarsa, Ermənistan Azərbaycandan qaz kəmərlərini bərpa etməyə hazırdır.

Nazirliyin bəyanatında qeyd olunur ki, Ermənistan və Azərbaycanın qaz nəqli sistemləri bir-birinə aşağıdakı magistral qaz kəmərləri vasitəsilə birləşdirilib:

Qazax-İrəvan, diametri 1000 mm, 6 km bərpa edilməlidir;

İliçevsk-İrəvan, diametri 700 mm, 22 km bərpa edilməlidir;

Gorus-Naxçıvan, diametri 700 mm, 16,5 km bərpa olunur.